Kiel alveni al la Dua BEMI-semajno en Kastelo Greziljono

←Reen

Bicikle

La plej bela maniero veni estas per propra biciklo en BEMI-karavano. Ni proponas kelkajn karavanojn, sed nur unu el ili okazos certe; la aliaj okazos nur, se aperos intereso.

Certa karavano

Startloko: Perl, ĉe la trilanda punkto de Francujo, Germanujo kaj Luksemburgio, bone atingebla per trajnoj kun biciklotransporto.

Startotago: ĵaŭdo, la 28-a de majo 2020

Distanco: 640 km en 10 tagoj, do trankvila ritmo

Gvidanto: Christine Brücker, christine.duisburg<heliko>gmx.de

Sportema karavano

Okazos nur se iu aliĝos. Ni ne bezonas bicikli rapide. Sed ni bezonos bonan disciplinon por ĉiutage starti frue kaj ne perdi tempon per longaj paŭzoj aŭ turismumado. Taŭgas por homoj kiuj ne estos liberaj jam dum Pentekosto.

Startloko: Perl, ĉe la trilanda punkto de Francujo, Germanujo kaj Luksemburgio, bone atingebla per trajnoj kun biciklotransporto.

Startotago: mardo, la 2-a de junio 2020

Distanco: 640 km en 5 tagoj, eventuale ni atingos la alian karavanon en la lasta aŭ antaŭlasta tago

Norda karavano

Okazos nur se iu aliĝos.

Startloko: Quiévrain, en Belgio ĉe la francujo landlimo, bone atingebla per trajnoj kun biciklotransporto.

Startotago: laŭ interkonsento, ekzemple en sabato, la 30-a de majo 2020

Distanco: ĉ. 550 km en 8 tagoj se ni startos en la 30-a, do kutima ritmo de BEMI-karavano

Sudorienta karavano

Okazos nur se iu aliĝos.

Startloko: Neuenburg-Müllheim, en Germanujo proksime de la trilanda punkto kun Francujo kaj Svislando, bone atingebla per trajnoj kun biciklotransporto.

Startotago: laŭ interkonsento, ekzemple en ĵaŭdo, la 28-a de majo 2020

Distanco: ĉ. 800 km en 10 tagoj se ni startos en la 28-a, do iomete pli rapida ol la kutima ritmo de BEMI-karavano.

Via karavano

Se neniu el tiuj karavanoj taŭgas por vi, proponu propran karavanon! Ni helpos vin organizi, kaj publikigos vian karavanon ĉi tie kaj tra niaj aliaj komunikkanaloj.

Trajne

Iam fervojo veturis ĵus malantaŭ la kastelo, sed delonge ne plu estas reloj. Nun anstataŭ trajnoj veturas tie bicikloj, kaj ankaŭ ni profitos de tiu nova agrabla biciklovojo.

Se vi venos kun via biciklo en trajno, tiam vi frontos kelkajn defiojn:

  • Elekti unu el la stacioj ĉirkaŭ la kastelo, de kiu vi poste biciklos la lastajn kilometrojn (minimume 25 km).
  • Trovi bonan trajnkonekton ĝis tiu stacio, kiu permesu kunporti biciklon.
  • Akiri bonprezan bileton por tiu konekto inkluzive de biciklotransporto.
  • Sukcesi entrajniĝi ĉe ĉiuj trajnŝanĝoj.

Por kuraĝigi vin tamen veni trajne, jen kelkaj konsiloj:

Estas diversaj kategorioj de trajnoj en Francujo. Iuj kunportas biciklon senpage kaj senanonce. Iuj kunportas biciklojn se rezerviĝas loko, jen senpage, jen kontraŭ pago. Iuj kunportas nur biciklojn dismuntitajn kaj pakitajn en sakoj. Iuj trajnkategorioj havas favorprezajn ofertojn, aliaj ne. Iuj biletoj estas aĉeteblaj ses monatojn antaŭe, iuj kvar monatojn, iuj nur tri monatojn antaŭe.

Plej multaj trajnlinioj eliras kiel radioj el la ĉefurbo Parizo. Sed tie ili ne estas konektitaj. Sekve, ĉe multaj konektoj vi alvenas en iu Pariza stacidomo, kaj devas bicikli tra la urbo por entrajniĝi en alia stacidomo. Tie vi devos atente rigardi la anonctabulon, ĉar la kajo, el kiu foriros via trajno, estas decidata nur kelkajn minutojn antaŭe. Por atingi la kajon, vi devos trairi barilon, kiu malfermiĝas skanante kodon sur via bileto. Tra normala barilo tia vi ne sukcesos iri kun biciklo – serĉu pli larĝan. Ofte la skaniloj misfunkcias, tiam petu helpon de fervojisto.

La plej proksimaj stacioj estas La Menitré (25 km), Tiercé (37 km), Saumur (40 km), Angers (44 km), Sablé-sur-Sarthe (51 km), Tours (75 km) kaj Le Mans (65km).

Post multe da esplorado, ni eltrovis ke por tiuj, kiuj trajnos tra Parizo, la plej interesa trajno estas la Intercités 4071 de la stacio Paris Austerlitz, kiu ekos en sabato, la 6-a de junio 2020 je 7:58 kaj alvenos en Saumur je 10:29. En tiu trajno vi devas rezervi lokon por via biciklo, kiun vi ne devas dismunti. Momente bileto el Parizo kostas nur 15 € inkluzive de la biciklotransporto; tio estas oferto kiu povas iam altiĝi. De Saumur estas biciklado de 40 km ĝis la kastelo. Eble vi ne biciklos sola.

Se vi aĉetos bileton por konekto kun tiu trajno, vi verŝajne bezonos tranokti en Parizo. Ĝenerale ni rekomendas ke vi aĉetu unu solan bileton el via startloko, eĉ se en eksterlando, tra Parizo ĝis la celstacio, ĉar tio kostas kutime malpli ol apartaj biletoj. Sed foje okazas ke pro la tranokto tio ne funkcias, kaj vi bezonas aĉeti du biletojn. Faru tion per la retejo de la franca fervojo https://www.oui.sncf. Vi povas elekti inter la franca, nederlanda, germana, hispana, itala, rusa kaj angla lingvoj. Ne hezitu kontakti nin per retpoŝto al lars.duisburg@gmx.de, se vi bezonas helpon.

Lui biciklon

Se vi preferas veni al Grésillon nek per, nek kun, sed sen biciklo, tiam vi povas lui surloke biciklon por la ekskursoj.

En la kastelo troviĝas kelkaj malnovaj donacitaj bicikloj, kiujn volontuloj lastatempe riparis. Ili estas prunteblaj senpage. Ni tamen nenion scias pri ilia kvalito, kaj tial ne pretas rekomendi ilin.

La turisma oficejo de la tre proksima urbo Baugé ofertas lui biciklojn, kiuj tre verŝajne taŭgas por niaj ekskursoj, kontraŭ 12 € tage. Eventuale eblos marĉandi por plurtaga luado. Necesas deponi kaŭcion de 150 €.

En la urbo La Flèche, kiu situas 15 km for laŭ bela biciklovojo, troviĝas filio de la firmao Ouibike. Tie eblas lui taŭgajn biciklojn kontraŭ 13 € tage, aŭ 68,50 € por unu semajno (de dimanĉo ĝis sabato). Ili ne postulas kaŭcion. Eblas rezervi rete je https://www.ouibike.net/
(en la franca, angla, germana kaj nederlanda).

←Reen